അച്ഛനുണ്ടെന്നുമെന്നും..(കവിത)

അച്ഛനുണ്ടെന്നുമെന്നുമെന്‍ ചാരേയായെ-
ന്‍റെ ,ച്ഛനുണ്ടീ ഭൂമിലോകം, നിറ നിറയെ..!!!!
അതിരുകള്‍ കാക്കുന്ന ദിക്കുകള്‍ക്കറിയാ-
മെന്‍റെ, ച്ഛനെയാണെനിക്കെന്നുമിഷ്ടം..!!!

പലതുണ്ട്,പലവുരു പറയാനുമുണ്ടെറെയുണ്ടെ
ന്‍റെ,ച്ഛനെന്നാല്‍, ആല്‍ മരതണല്‍പോലാകെ
കുളിരെകുമോര്‍മ്മതന്‍ ജ്വാല മര്‍മ്മരമെന്നോ
സ്നേഹ കടലാഴമെന്നോ പേര്‍ ചൊല്ലിടട്ടെ....!!!

തെളിമയാം തൂ മഞ്ഞു പോലെ,ഹേമന്ദ, മകരന്ദം
പുഷ്പ ദളങ്ങള്‍പോല്‍ തനുവില്‍ നിറയുന്നതെന്തോ
അത്രയും സ്നിഗ്ദത പൈമ്പാല്‍ കനിവായിരുന്ന,ച്ഛന്‍
പേരറിയാത്തൊരു,മധുരമാം,നോവായിരുന്ന,ച്ഛന്‍ !!

ഞാനുമെന്‍, കൂട കിടാങ്ങളുമമ്മയും,മെത്രയോ -
രാവിന്‍ വഴി കണ്ണില്‍, മിഴിനട്ടിരിക്കവേ,ഇട വഴി
യരികിലൊരു,ചൂട്ടു വെട്ടത്തിലാഗമിക്കുന്നോരാത്മ
ബലമായിരുന്നാത്മാവുമായിരുന്നെന്നുമെന്‍റ.ച്ഛന്‍!!

പ്രാണന്‍ പിടയവേ ഓര്‍ത്തിരുന്നുണ്ടാവുന്റെയുണ്ണി-
കള്‍ക്കാരിനിയാലംബമാശ്രയം?,അതായിരുന്നച്ഛന്‍.
ഒരുപിടിയുരുള ബാക്കിവക്കുന്നതെന്തിനായിരുന്നു ?
കൈകുടന്നയില്‍ ''ലോക''മെന്നെഴുതിയിരുന്നല്ലോ!

അതുമതി,യതുമാത്രം മതിയെനിക്കുമെന്‍റെയുടവര്‍-
ക്കിനി,യേതു നരകമെന്നാകിലും, വഴി വെട്ടമുണ്ട്.
ദീപ്ത സ്മരണികകൊണ്ടൊരാഗതമായ മനോ ശക്തി-
യുണ്ട,ച്ഛന്‍ പകര്‍ന്നരുളിയ കെടാവിളക്കുമുണ്ട്!!!

കൃഷ്ണ കുമാര്‍.കൂടാളി
ഗോകുലം, കീഴല്ലൂര്‍..